ارض الوطن
(1)
قالو زمان السكوت من ذهب
قالو زمان السكوت من ذهب
قولت انا الكلام يحلالى
وهوا الوطن مهما كان عفير مغبب
طالما راية الوطن بترفرف ... يبقى الهوا اصفالى
واذا كان اللوم على عاشق وطن
يامحلى اللوم .. دا اللوم بيطلعنى العلالى
قالولى سافر شرق وغرب
قولت اروح فين ومين اولى بيا
ارض الوطن ولا العالم الضلاليه
بيرحبوا بيا
بيفرشولى الارض اوهام
عارفينى انى جاى مغصوب
لجل احقق الاحلام
شابفبنى مضروب بالعصاية
بالكرباج
على السكك وفى قلب الاقسام
شايفينى منهان فى بلدى مع انى اصيل
ساعة الجد ... بيبان الاصل فيا قوام
متتحايلوش
لو سبتوا الوطن النهارده
هترجعوا بكرة حتى زبالة الوطن
مهتلاقوش
ليه اسافر وليه اتغرب
ولية اعيش وسط ناس ميعرفوش معنى الكرامه
ليه اعيش وسط الزنا وسط الفجور
لو هيا دى الحرية
مش عايزها
تولع تغور
بحلم ياوطن ونفسى الحلم يتحقق
اشوفك ياوطن بهمة الشباب عالى
ماهو غيرك ياوطن ارض تانى
والله ماتحلالى
(2)
حزمة شباب عالطريق متجمعين
بيضحكوا من برة
بس الدموع فى العيون ساكنين
بنقول عليه شباب صايع
وهو فى وسطنا ماشى
مكسور
وحقوا من زمااااااااااان بادينا ضايع
فوقوا ياهل البلد
صاحب البلد باع البلد
شرد شباب كان شغال بيدى بضمير
وبدل يملى بلادنا صينى
من لبس لمداس
لاكل وانفاس
حتى ببرونة الطفل الصغير
ارحمونا ... الشباب هيعمل ايه
مش لاقى شغل
وبتفتروا عليه
ادولوا فرصه
طب نص فرصه
اومال بتقولوا كل الشباب شغالين
معندناش بطاله ولا عاطلين
اومال اللى بنشوفهم دول ايه
ولا احنا عميانين
والله الشباب سايبلكوا اللجام
بكرة يشدوا
وساعتها هيتمنع الكلام
وهتولولوا ... بس مين هيسمع زعاق
مفيش غير صوت واحد
صوت الجيل اللى فاق
بقينا فى الفين وخمسه
والنفاق هوا النفاق
والضلال هو الضلال
وابن الحرام م خلى شئ لبن الحلال
وتتنكسى يارية الوطن
ابدا محال
حزمة شباب رافعين علمكى
حزمة شباب ماشيين بدمك
حزمة شباب بتحمى ارضك
(3)
فى يوم دخولى الجيش
حسيت انى ... مفيش
مع انى متعلم وواخد البكالريوس
بس علام ايه
وشهادات ايه
والضلال فوق رقبتى بيعدى ويدوس
كسرتوا فينا الامل
سديتوا النفوس
قولت اعدى واخدم بلادى
عهد عليا
من اجدادى
طول مالدم فى العرق يسرى
ميدنسك ظالم يابلادى
ندانى الصول قاللى فوق
مانت مالمرار عمال تدوق
وعمالين نتباع غنم فى سوق
والقبض كله بايد البيه
عمل لك ايه
ماهو كل يوم بيدوس عليك زياده
مبسوط بانكسارك وطاير مالسعاده
وشلة نصابين
حواليه
محسسينه بالرياده
بس بكرة الارض دى هتجيب رجال
يشيلوا عنك يابلد ظلم الكلاب
يدوقوك الفرح بعد سنين العذاب
هينفضوا عن الشعب الهموم والتراب
هيعمروا
هيخضروا
هيزينوها بعد سنين عجاف
ولاسمك يابلاد شفايف مش هتبطل
يوم هتاف
الزقازيق
فى
الثلاثاء 15/3/2005
ليست هناك تعليقات:
إرسال تعليق